Ephesians 3
Wamp Rᵾⱡaip Elpa Kᵾⱡ Nga Pol Kongun Itim Mel
1Uⱡ puⱡ ila nga, na Pol Kraist Jisas nga kongun kindmant wu ei moⱡᵾp, enim wamp rᵾⱡaip elpa kᵾⱡ nga nᵾmp kᵾn, Got kᵾn atinga rondᵾnt. 2Enim kupa pᵾtᵾng ei, Got elim nga wamp kont kuⱡpa, poⱡ tᵾtᵾm uⱡ ila, na enim nga nᵾmp kongun ei, iteimp nimba ngurum.3Got nga ik mo ropa titim ei, na kᵾn nimba nguⱡnga pit. Ei nga, na mon koⱡmung ti rop, enim unt ngur ei, mon rur ei mel kᵾmp rok kanᵾng ndam, na Kraist nga ik mo ropa tetᵾm na pit ik ei enim pilik piral nduing. 5Ik mo ropa ei, Got ndi, unt ui mbila nimba wamp ngui ngᵾnggᵾrᵾm. Wote, akup Got ndi, Muⱡnga Wingti ila ik ei nimba, nombuⱡa rung wamp, ik painui wamp wingti na mbᵾ kᵾn, etpa piral nduⱡnga pᵾnmᵾn. 6Ik mo ropa titim ei, enim mbo wamp rᵾⱡaip elpa mbᵾ, Rᵾnang Ik Kai ila Jura wamp rᵾⱡaip kᵾⱡ kᵾn ok, rᵾⱡaip tenda etᵾk, wote kᵾng tenda mormᵾn. Uⱡ ila enim kapⱡa Got ndi, Kraist Jisas kᵾn memp kai nguimp nimba pinditim uⱡ mbᵾ kapⱡa ting.
7Got elim nga wamp kont kuⱡpa, poⱡ tᵾpa etᵾm uⱡ ei nga ronduⱡ ila, na etpa kindmant wu muⱡeimp nimba, na ronduⱡ ngurum. 8Na Got nga wamp kit kurpa mbᵾ nga ama mana orunga mor. Ei wote, Got elim ndi, uⱡ kai etpa Kraist nga uⱡ kai tetᵾm mbᵾ nga Rᵾnang Ik Kai ei, wamp rᵾⱡaip elpa mbᵾ, nᵾmp ngeimp nᵾmba, na ik ei ngurum. 9Got ndi, mel mbᵾ pora itim. Wote, elim nga numan ila namba uⱡ itimp nimba pitim uⱡ mbᵾ, unt etpa mo ropa pinditim. Wote, akup na etpa, kongun ila mondpa, uⱡ mo ropa mbᵾ kᵾn, wamp mbᵾ kᵾn, nᵾmp piral ndeimp nimba itim. 10Elim nga numan ila itimp nimba pitim uⱡ ei, akup elim nga rᵾnang ik kai ei, tᵾpa mot nduⱡnga, Got nga pilpa kungᵾndi elpa elpa pᵾtᵾm mbᵾ, wi muⱡ kona rᵾp wu na, nuim ronduⱡ na mbᵾ ndi kanmin. 11Got ndi, unt kor nga itimp nimba pitim uⱡ ei, Nuim Kraist Jisas ndi, etpa omp rundrum. 12Tᵾn Kraist kᵾn mondᵾp pilpᵾn, elim kᵾn moⱡpᵾn, wote kapⱡa Got nga morum kona ila mbin ei, mel ti ndi, imp muⱡi nambᵾⱡmba. 13Ei nga, na ndi, enim waldᵾp kᵾn, enim mbi ou teing nᵾmp mindil nont ei nga, enim numan ou ndupa pili nᵾpᵾlᵾi!
Kraist Nga Wamp Numan Ngui Uⱡ Ei
14Uⱡ puⱡ ila, na Wuta nga kuimp keta ila, mura koptᵾm rop mondᵾp, atinga ront. 15Tᵾn wamp pora wi muⱡ kona kep, mᵾi kona kep, Wuta ei kᵾn, mbi kupa tᵾtmᵾn. 16Got ronduⱡ minal tetᵾm wu ei waldᵾp kᵾn, enim Muⱡnga Wingti oi ndupa ngangga, enim nga rukᵾr orunga, ronduⱡ tangina, wote mondpa pili uⱡ ila, Kraist enim nga mundmong orunga omba nuim muⱡangga. Na atinga rop kᵾn, wamp numan ngui uⱡ ei, nde na ni mel, mᵾi ila pᵾⱡ kan nguk ronduⱡ mundᵾk itᵾi! 18I etᵾk kᵾn, enim kep, Got nga wamp mbᵾ pora, ronduⱡ tᵾk kapⱡa endᵾk, Kraist nga wamp numan ngui uⱡ ei ruⱡ, muna nondpa etpa tetᵾm, muna wi oⱡa tetᵾm, muna mana tetᵾm ei, pilik mbi nduing. 19Ei, Kraist nga wamp numan ngui uⱡ ei ndi, numan wei mbᵾ, akpa tᵾpa oⱡa ndupa mandpa tetᵾm uⱡ ei, pilik mbi nduing. Ei kᵾn, Got nga uⱡ kun kai mbᵾ pora, enim kᵾn tepa omba, kapⱡa endangga.20Elim nga ronduⱡ ei, tᵾn nga mundmong orunga kongun etᵾm. Ronduⱡ ei ndi, tᵾn nga numan pᵾtmin, wote atinga rormin mbᵾ, tᵾpa rapᵾndᵾpa ama kongun ronduⱡ mundpa etᵾm. 21Got nga mbi paka rundi uⱡ ila, elim nga mbi ou ti uⱡ ei, Kraist Jisas kᵾn uⱡ nga kᵾnt nga tepa mint pangga! Ei kupa!
Copyright information for
MED